មេបញ្ជាការកងពលតូចថ្មើរជើងលេខ៥៣ កោតសរសើរកងកម្លាំងតស៊ូអត់ធ្មត់បំពេញភារកិច្ចតាមខ្សែបន្ទាត់ព្រំដែនកម្ពុជា-ថៃ !!!!
ដោយះ លោក ពេជ្រ ចាន់វិជ្ជា
ចេញផ្សាយថ្ងៃអង្គារ ២រោច ខែចេត្រ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ៣០ ខែមីនាឆ្នាំ ២០២១
ព័ត៌មានជាតិ
រាជធានីភ្នំពេញ:
ឧត្តមសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣ កោតសរសើរដល់កងកម្លាំងចំពោះការតស៊ូអត់ធ្មត់បំពេញភារកិច្ច ក្នុងបេសកកម្មទប់ស្កាត់ពលករឆ្លងដែន និងទប់ស្កាត់ការឆ្លងរីករាលដាលជំងឺកូវីត-១៩ មិនឲ្យចូលទៅក្នុងសហគមន៍។ លោកបានមានប្រសាសន៍ថា អ្វីដែលបងប្អូនកងកម្លាំងបានខិតខំប្រឹងប្រែងនៅពេលនេះ គឺជាវីរភាពដ៏អង់អាចក្លាហានគួរឲ្យកោតសរសើរ។
បងប្អូនបានលះបង់កម្លាំងកាយចិត្តដើម្បីបុព្វហេតុជាតិ និងប្រជាជនយើង ដែលប្រទេសជាតិកំពុងស្ថិតក្នុងគ្រោះមហន្តរាយធ្ងន់ធ្ងរដោយសារជំងឺដ៏កាចសាហាវវាយលុកឆ្លងរីករាលដាល។ លោកបន្តថា យើងត្រូវតែបន្តធ្វើកិច្ចការនេះទៀត លុះត្រាតែមេរោគរាតត្បាតនេះរលត់ផុតទៅ និងសូមឲ្យបងប្អូនកងកម្លាំងរក្សាខ្ជាប់នូវវិន័យថ្លៃថ្នូរជាកងទ័ពជាតិ គោរពបទបញ្ជាម៉ឺងម៉ាត់ និងធ្វើការសហការជាមួយកម្លាំងមិត្តជិតស្និទ្ធ។
នៅក្នុងឱកាសនោះ ឧត្តមសេនីយ៍ត្រី កែវ សេងលន មេបញ្ជាការកងពលតូចថ្មើរជើងលេខ៥៣ ក៏បានណែនាំកម្លាំងត្រូវមានសីលធម៌ និងសុជីវធម៌ នៅពេលឃាត់បានពលករឆ្លងដែន ត្រូវនិយាយពាក្យសមរម្យ ពន្យល់ណែនាំពួកគាត់កុំឲ្យមាការភ័យខ្លាច និងឲ្យពួកគាត់ផ្សព្វផ្សាយបន្តដល់សាច់ញាតិបងប្អូន ដែលនឹងត្រូវត្រឡប់មកមាតុប្រទេសវិញ ចូលតាមច្រកព្រំដែនដែលបានកំណត់ កុំគេចវេសពីការធ្វើចត្តាឡីស័ករយៈពេល១៤ថ្ងៃអោយសោះ ព្រោះថា ប្រសិនបើបងប្អូនគេចវេសពីការធ្វើចត្តាឡីស័ក វាមិនត្រឹមតែនាំមេរោគចម្លងដល់សាច់ញាតិបងប្អូន ក្រុមគ្រួសារ និងគ្រោះមហន្តរាយដល់សង្គមជាតិប៉ុណ្ណោះទេ បងប្អូននឹងត្រូវបានផាកពិន័យ ហើយទទួលទោសទៅតាមមាត្រានៃច្បាប់ថែមទៀតផង។
សូមបញ្ជាក់ថា ដោយសាររដូវបុណ្យចូលឆ្នាំប្រពៃណីជាតិខ្មែរជិតឈានមកដល់ ពលករចំណាកស្រុកជាច្រើនបានសម្រុកចូលមកក្នុងប្រទេសវិញ ខ្លះឆ្លងដែនតាមច្រកព្រំដែន ដែលបានកំណត់ និងខ្លះទៀតលួចឆ្លងដែនតាមច្រករបៀងតូចៗ៕
ដោយះ គេហទំព័រ បារមីមានរិទ្ធិ លោកយាយម៉ៅ
https://www.bmm-news.com/
